یہ شہر تمہارے باپ کا نہیں ہے --نجیب ایوبی

مسجد کے مرکزی دروازے کے سامنے میدان نما خالی زمین پر ایک جانب سبزی اور پھلوں کے ٹھیلے مستقل بنیادوں پر موجود تھے ، درمیان میں سبزیوں کا کچرا -------، لکڑی کی خالی پیٹیوں اور گلے سڑ ے پھل اور ان کے چھلکوں کا ڈھیر-------------- ،

دوسری جانب لکڑی کی چھوٹی سی ٹال ، یہی ہماری گزر گاہ بھی تھی . گھر سے مسجد تک آنے جانے کے لیے اسیخالی پلاٹ والی راہداری کو استعمال کرنا ہوتا تھا --- یہ ٹال "گل خان" کا ڈیرہ بھی تھا اور شکم کی آگ بجھانے کا ذ ریعہ بھی-----------. لکڑی کی ٹال کے کونے پر جھونپڑی تھی ، دو جھلنگ قسم کی چارپائییاں اس جھونپڑی کے باہر ہی پڑی رہتیں --------- لکڑیاں گول مٹول بغیر کٹی ہوئی الگ ، کٹی ہوئی الگ اور موٹے موٹے لاٹ سلیقے کے ساتھ دیوار کی مانند ٹال کے ارد گرد فصیل کا کام دیتے -- بیچوں بیچ لکڑی کا چوں چوں کرتا ترازو ایستا دہ----، اس سے ذرا فا صلے پر مختلف قسم کے کوئلے ، چکنے مگر سیاہ کوئلے ا لگ ، گول ڈھنٹھل گانٹھ لگا کوئلہ علیحدہ ، اور چورا کوئلہ الگ ----- یہ سب اس سلیقے سے لگے ہوتے کہ اندھا بھی ان کے درمیان تمیز کرلے- گل خان جب لکڑی کاٹتا تو دیکھنے کا سماں ہوتا ، گل خان کا پہلے دونوں ہتھیلیوں پر" تھو " کرنا ، پھر کلہاڑا سنبھالنا ، موٹی لکڑی کو درمیان میں رکھ کر اسکا سنٹر بنانا ،اک دو مرتبہ جائزہ لیکر تیزی کے ساتھ کلہاڑا سر تک لیجاکر منہ سے "ہنپ " کی آواز نکالتے ہوتے لکڑی پر پوری قوت کے ساتھ ضرب لگانا دیکھنے سے تعلق رکھتا تھا - گل خان کے ایک وار میں ہی بڑی سے بڑی لکڑی کی اکڑ نکل جاتی ، اور دو تین مرتبہ کی " ہانپ ہنپ " میں لکڑی کے کئی ٹکڑے ہوجاتے - "نصیب گل " کے شہر آجانے سے گل خان کا بوجھ بہت حد تک کم ہوگیا تھا ، اب گل خان یا تو لکڑیاں وزن کرتا ، اور سلیقے سے جماتا یا پھر اپنی جھلنگ چارپائی پر کمر لگا کر اپنے جوان بیٹے نصیب گل کے کام کا جائزہ لےرہا ہوتا - محرم میں حلیم کی دیگ بنانی ہو، شادی بیاہ پر دعوت کا کھانا بنانا ہو یا عید بقرعید پر تکہ پارٹی ہو، ٹال پر رونق لگی رہتی ، سیزن میں گل خان اور نصیب گل دونوں ہی ہانپ ہنپ کرتے ---مغرب سے پہلے ٹال بھی بند ہوجاتی - عشاکی نماز کے بعد ہی دونوں باپ بیٹا جھونپڑی کے باہر چار پائیوں پر سو رہتے ، صبح سویرے اٹھ کر اپنے معمول میں لگ جاتے . گل خان مسجد میں ہر نماز میں موجود ہوتا کپڑے کسی بھی رنگ کے ہوں ، کالے دھبے ہمیشہ ہی اس کے کام کی چغلی کھارہے ہوتے -منہ پر کالک کی کوئی نہ کوئی لکیر ہمیشہ ہی رہتی ، کبھی کم کبھی زیادہ وقت تیزی سے گزرتا چلا گیا ، میرے انٹر کے امتحانا ت ہوگئے دو مہینوں کی طویل چٹھیاں ایسے میں شہر کی انتظامیہ نے بلدیاتی انتخابات کا اعلان کردیا روزانہ کوئی نہ کوئی کارنر میٹنگ ، جلسہ یا پھر کوئی جلوس ، پورا شہر انتخابات کے بخار میں مبتلا ہوچکا تھا - مگر گل خان اور نصیب گل ہمیشہ کی طرح "ہانپ ہنپ" میں مست رہے ، انہیں کوئی غرض نہیں تھی کے شہر میں کیا ہورہا ہے ، کون جیتے گا ، کس کے ہارنے سے کس کو فائدہ یا کس کو نقصان ہوگا ---وہ یا تواپنی ٹال پر ہوتے یا مسجد میں - ایک دن عجیب سا واقعہ ہوگیا ، کسی نے انتخابی امیدوار کا قتل کردیا ، الزام مخالف پارٹی پر لگایا گیا --- دوسرے دن دوسری پارٹی کے دو ہمدرد سر راہ قتل کردیے گئے -- - پھر کیا تھا ، مختلف علاقوں میں کشیدگی پھیل گیئ - اخبارات موٹی موٹی شہہ سرخیوں میں رپورٹ جاری کرنے لگے -- شام کے دو روپے والے اخبارات نے سنسنی خیزی کی انتہا کردی ، زخمیوں اور ہلاک شدگان کی رنگین تصا ویر کے صفحات پر لگانی شروع کردیں -- انتظامیہ ان فسادات کو کنٹرول کرنے میں مکمل طور پر ناکام ہو چکی تھی --- ہر محلے میں ہنگامے پھوٹ پڑ ے- زبان کی بنیاد پر علاقے تقسیم ہوگئے - ہمارا علاقہ بھی اسی زد میں آگیا راتوں کو چوکیداری کا نظام تشکیل دیا گیا - مشکوک افراد کو دیکھتے ہی کھمبے بجنا شروع ہوجاتے --- ایک رات محلے کے نوجوان کا قتل ہوا - سارا محلہ جنازے کے جلوس میں شریک تھا ، جنازہ ختم ہوا ، تدفین کے بعد سڑک بلاک کردی گئی - خوب نعرے بازی ہوئی -ٹا یر جلے - پتھراؤ ہوا ، مگر لوگوں کا غصّہ تھا کہ کم ہونے کا نام ہی نہ لیتا تھا ، پولیس آئی ، آنسو گیس پھینکنی پڑی - نوجوانوں کی ٹولیاں گلیوں سے نکلتیں اور گلیوں میں چھپ جاتیں -- آنکھ مچولی رات گئے تک جاری رہی - گل خان ، نصیب گل اپنی جھلنگ چارپائیوں پر سو چکے تھے --شور شرابے سے اٹھ بیٹھے- " اوے نصیب گلاں ! اوے نصیب!" گل خان نے جھنجھوڑ ھتےھوے آواز لگائی - "خان بابا -- کیا اوا، خیر تو اے " "نصیب اٹھ! لگتا اے اما رے ڈیرے پر حملہ ہوا ہے " نصیب گل پوری طرح بیدار ہوچکا تھا ، "بابا--میں دیکھتا اے تم فکر مت کرو "ارمان رکھو ، ادھر کوئی نیئنآے گا " نصیب گل نے باپ کو تسلی کروائی -- چارپائی سے اٹھ کر چندقدم آگے بڑھا -- ٹال کے بیچوں بیچ آکر دوبارہ گل خان کو مخاطب کیا " بابا ، دیکھو کوئی بھی تو نہیں ہے -- " اچانک کسی نے پیٹرول کا کنستر انڈیلا ، ماچس پھینکی،، شعلےبلند ہوے پھر کیا تھا -- ہر طرف آگ تھی ، دھواں تھا --آگ کس نے لگائی کسی کو نہیں معلوم ؟ نصب گل کے کپڑے آگ پکڑ چکے تھے " نصیبا اوے نصیبا -- مڑ اں آگ بجھا -- نصیبا " گل خان دیوانہ وار چیختا جارہا تھا -- ہجوم نے اس کو بھی دبوچ لیا تھا -- "ماڑ اں--عمارا قصور بتا ؤ ---- ام بیگناہ اے نصیب گل بیگناہ اے ،خدا قسم اما رےکو کچھ معلوم نئیں " گل خان چلاتا رہا -- نصیب گل کوئلے کے ڈھیر پر گر چکا تھا ، شعلوں میں نہ نصیب گل دکھا ئی دے رہا تھا ، نہ ہی گل خان ! آگ تھی کہ تھمنے کا نام ہی نہ لیتی تھی -- بلند و بالا شعلے آسمان سے باتیں کر رہے تھے -- "سالے بہت مزے کرلیے شہر میں- یہ شہر تمہارے باپ کا نہیں ہے ---- ہمارا ہے ہمارا ----" ہما رےمحلے سے انتخاب لڑنے والے امیدوار سینہ ٹھوک ٹھوک کر آگ لگانے والوں کی حو صلہ افزائی کررہے تھے ---- صبح فجر سے پہلے آگ بجھ چکی تھی -- فسادی گھر لوٹ گئے تھے -- آخبارات کی شہہ سرخیاں تیار تھیں مسجد کے باقاعدہ نمازی خالی پلاٹ والی گزرگاہ سے اپنے کپڑے اور ہاتھ پاوں بچاتے مسجد جارہے تھے --- ٹال کا سارا کوئلہ ، لکڑی ،گل خان اور ، نصیب گل جل کر کوئلہ بن چکے تھے---- لکڑی کی ساری اکڑ نکل چکی تھی